لو بتفكر تبدأ تحسين الظهور على السوشيال ميديا باستخدام القصص Stories وبتدور على أفضل الاستراتيجيات، إذًا بدأت الخطوة الأولى لطريق النجاح والشهرة. ما في شك إنه الستوريات صارت طريقة مذهلة في تحسين الظهور على الانستغرام والفيسبوك وكل السوشيال ميديا، لهيك اشرب قهوتك على رواق وركز كيف تبهر جمهورك بأفخم قصص تفاعلية تجذب الجمهور وتخليهم ما يطلعو من عندك! 

كتيرة أسرار جذب الجمهور  بالقصص اللي سهلت على العلامات التجارية تثبت وجودها رغم ضخامة المنافسة في السوق، لهيك إنت بحاجة ماسة تعرف كيف تخلي الستوري تبين أكتر للمتابعين. بمقالنا المميز حابين ندردش مع بعض عن استراتيجيات تحسين الظهور على السوشيال ميديا، وأفكار ستوري إبداعية للأعمال ممكن تساعدك، ونصائح وتفاصيل كتيرة لتعمل انفجار بنسبة التفاعل على الستوريز  عندك، وتفرج على البيع والشهرة.

استراتيجيات تحسين الظهور على السوشيال ميديا باستخدام القصص

نورت بيتك ومطرحك! إنت على بعد خطوات من سطوع شمس حظك وتصير علامتك التجارية حديث الساعة .. يلا نحكي عن كل شي بتحتاجو من استراتيجيات استخدام الستوري للتسويق لتحقق أهدافك:

1. خطط صح لأفكار ستوري إبداعية لأعمالك 

بغض النظر عن عفوية الستوري الي بتنزلها! لكن السر إنه يكون في هدف أو فكرة بتقدمها تتناسب مع هوية علامتك التجارية، 

لذلك لازم تكون عارف أنواع المحتوى الأكثر تفاعل في المجال، بإمكانك تختار محتوى عالي الشعبية مثل:

• المحتوى القصصي أو خلينا نقول Storytelling 

من أقوى أفكار ستوري إبداعية للأعمال إنك تطرح فكرة أو هدف بأسلوب سرد قصصي، وما في شك إنه الأسلوب أعجب ملايين المشاهدين أكتر من محتويات تانية. السرد القصصي بالستوري من أقوى استراتيجيات تحسين الظهور على السوشيال ميديا باستخدام القصص Stories، كلنا بنوقف كتير وبنعيد وبنزيد بالقصة من أولها لآخرها لو كان الأسلوب مشوق. وطريقة السرد جذابة ومميزة، لهيك بركز لك على الأسلوب والفكرة في السرد القصصي بالستوري بأنهم الأساس لتخلي المشاهد يكمل ويراقب ويتابع ستورياتك.

ال Story Telling فن بحد ذاته لو أبدعت فيه لتوصل رسالتك للعميل وقدرت تخليه يعيش التجربة فعلًا! وبنيت روابط عاطفية معه معناته إنت صرت نمبر ون بالمجال.

كتير أفكار مبتكرة للقصص على وسائل التواصل بتقدر تعتمدها بالتسويق، لكن الشطارة الحقيقية كيف تستفيد من القصص في بناء علاقة مباشرة مع متابعينك.

زود معلوماتك: 8 استراتيجية تسويق ناجحة عبر سناب شات بتوصلك للعالمية

• لا تبخل بالوصف والعناوين الفرعية على الستوري 

لو ناوي تدخل قلب وعقل عميلك بنفس اللحظة! إرضيه بإنه تعرفه عن شو بتحكي حتى لو جاي على بالو يشوف الستوري بدون صوت. رح يعرف إنك مصمم توصل فكرتك ويفهم بدون ما يضطر يشيل كتم الصوت ويعكر مزاجو بهاي اللحظة، كل المطلوب منك تشرح له باختصار عن فكرتك من الفيديو ليكون فاهم على شو بتفرج.

• الفلاتر والستيكرز إضافة حلوة .. لكن بدون مبالغة 

صارت الفلاتر والستيكرز متوفرة على أي منصة اجتماعية طبعًا! لكن بنصحك لا تبالغ باستخدامها؛ لأنه زي ما بنقول بالأردني “كل شي إن زاد عن حده قلب ضده”. ركز مزبوط واعرف الموضع المناسب لتستخدم الفلتر، لأنه عميلك محتاج يتفرج بدون تلوث بصري يستفزه وينجبر يترك الستوري؛ ويمكن يعملك إخفاء أو إلغاء متابعة. وهيك إنت الBig Loser ما في شك مع الأسف .. انتبه ما تغلط الغلطة حتى توصل قمة النجاح.

• متع مسامعه بقصة متكاملة 

كتير ستوريز بتطلع قدامنا واحنا بنقلب على السوشيال ميديا! واحنا كعملاء بستفزنا إنه نندمج بموضوع أو قصة وما نلاقي تكملتها .. البعض بحاول يجبر المشاهد إنه يدور على التكملة. طبعًا بحب أخبرك إنه الي بالو طويل بس رح يدور .. لكن معظم المتابعين رح يتعدى عنك ويدور على غيرك يكون يلبي حاجتو ويرضيه بدون ما يقطع عليه اندماجه.

لو كان عندك عدة قصص حابب تعرضها كون حريص إنه كل لقطة تكون مرتبطة باللي قبلها لحتى تكمل القصة، وبعدها ابدأ بقصة تانية. التشويق والجذب والسرد المميز ضروري لتضمن بقاء العميل حتى النهاية. من هذا المنطلق ساهمت الستوري القصصي على رفع التفاعل على السوشيال ميديا بشكل مهيب لكتير علامات تجارية، ولاحظنا مؤخرًا إنه أسلوب التسويق التقليدي بدأ يتراجع جدًا ليحل محله استخدام الستوريز في التسويق المحلي بطريقة جنونية.

اقرأ: 5 استراتيجيات تسويقية لجذب مليون عميل

2. العناصر التفاعلية بالستوري بتضاعف تفاعل جمهورك

مش بس السرد القصصي بزيد التفاعل على الستوري! عندك كتير خيارات ممكن تعتمدها لتخلق فرصة تفاعل مباشر، وقدامك الخيارات التالية:

استطلاعات الرأي Poll، سؤال على السريع مش ضروري يحتاج تفكير وتعقيد .. ممكن يكون جوابه موافق أو لا مثلًا .. لو كنت صاحب مطعم اعمل استطلاع على أكلات مشهورة باختيار المفضلة عندك ( متلًا شاورما ولا بروستد). 

شجع جمهورك يسحب السلايدر ليعبر عن مدى حبه وإعجابه.. لتعرف درجة إعجاب وحب جمهورك بشيء معين. كويز على السريع كمان استراتيجية فظيعة بأنك تستخدم الستوري لتفاعل أكبر.. لكن لا تنسى لازم يكون متعلق بمحتواك وعلامتك التجارية.

لو اعتمدت هاي الأساليب وحققت تفاعل كبير رح تفهم الخوارزميات إنه محتواك محبوب ومفيد وبترشح ظهورك لجمهور أكتر، وبتحقق شعبية وشهرة أوسع، وهيك بتكون استغليت أقوى استراتيجيات تحسين الظهور على السوشيال ميديا باستخدام القصص Stories على منصتك.

احذر من: أخطاء التسويق على السوشيال ميديا

3. اربط القصة Story بموقعك الإلكتروني 

شو المانع إنك تضرب عصفورين بحجر واحد! حقق تفاعل أعلى الستوري بالقصة الي بتحكيها. وكمان شجع الجمهور ينتقل لمدونتك أو موقعك حتى يعرف التكملة، لكن لا تبالغ بالموضوع حتى ما يصير ممل.

كتير بلوجر متخصصين بالطبخ والوصفات بعرضو فيديوهات لأكلات إلها شعبية كبيرة بعد ما تجهز. وأكيد منظرها بشد الجمهور ليعرف كيف انعملت! الفكرة إنه بكون التشجيع “لتعرف المكونات تفضل على قناتنا على يوتيوب” مثلًا لتعرف بالتفصيل. أسلوب حقق تفاعل على المنصة الاجتماعية سواء سناب شات أو تيك توك أو انستغرام أو غيرها.. وزاد المشاهدات على قناة اليوتيوب بنفس اللحظة.

هاي الطريقة كثير بتبني جسور ثقة وتواصل وولاء بينك وبين جمهورك، وكمان بتضمن لك تزيد حركة المرور على موقعك بكل ذكاء.

4. ركز على التصميم البصري الجذاب 

حاليًا إنت محتاج تجذب المشاهد بلفت انتباهه للتصاميم والألوان والتفاصيل المثيرة. وأكيد الستوري بتعتمد أساسًا على هاد النوع من أساليب الجذب، عشان هيك حط باعتبارك النصائح:

• اعتمد ألوان محددة بتعكس علامتك التجارية وبتخليها مميزة.
• استخدم خط واضح وبسيط ومميز يريح نظر المشاهد ويسهل القراءة عليه.
• ما في مانع لو اعتمدت قالب ثابت تستخدمه عدة مرات بمحتوى مختلف وجديد كل مرة.

5. اهتم وفكر مزبوط بمواعيد النشر وتحليل الأداء 

لازم تعرف إنه جمهورك إله مواعيد وأوقات بكون فيها بذروة نشاطه، وكذلك إنه مش الشطارة بكثرة النشر بدون تكتيك أو تفكير. إنت محتاج تستخدم أدوات تحليل الأداء لتحدد الموعد المناسب وتعتمده بالنشر، أدوات تحليل الأداء بتساعدك ما تثقل على جمهورك وتزعجه. خلي تعديلاتك حسب إحصائيات التفاعل لتشتغل مزبوط.

إنك تهتم لاختيار مواعيد النشر المناسبة في السوشيال ميديا يعني بطريقك لتحقق أعلى مستوى من التفاعل مع الجمهور والوصول إلهم، بكل بساطة إنك تختار الوقت المناسب للنشر على المنصة اللي بتستخدمها بحسن ظهور محتواك للجمهور المستهدف، وبرتفع التفاعل بالإضافة لتحقيق الأهداف المطلوبة للعلامة التجارية أو حتى لحسابك الشخصي.

بإمكانك تستخدم أدوات كتير لتحدد أوقات الذروة، ومواعيد النشر المناسبة لتحسن كمان أداء خوارزمية حسابك على السوشيال؛ لأنه الخوارزميات عامةً بتعطي فرصة أكبر للظهور للحسابات اللي بتتفاعل مع الجمهور وبتنشر بالمواعيد المناسبة، اعتمد على الأدوات التالية:

• أداة Hootsuite من أقوى أدوات التحليل المدمجة الي بتساعدك تجمع كل معلومة بتحتاج لها عن سلوك الجمهور ووقت نشاطهم لتبدأ النشر.
• Sprout Social، من الأدوات التي بتعطيك تحليلات دقيقة وتقارير عن الأداء، لكن ممكن نعتبرها مناسبة للشركات أكتر من الأشخاص.

6. ادرس المنافسين واعرف نقاط قوتهم وضعفهم

بكل مجال في منافسين كتير! منهم الناجح ومنهم الي لسه بشق طريقو .. إنت دورك تراقب أدائهم وتعرف نقاط قوتهم وتعتمدها وتركز عليها وتستخدمها بطريقتك. أما نقاط الضعف تجنبها وابتعد عنها تمامًا، حتى ما توقع بنفس الفخ اللي وقعو فيه قبلك. كمان ضروري تهتم بالبحث عن الكلمات المفتاحية وذات الصلة المرتبطة بمجالك، لتستهدف جمهورك صح، وتنافسهم عليها.

بإمكانك تستخدم أدوات استهداف الكلمات المفتاحية للسوشيال ميديا لتضمن تحسين الظهور والتسويق بالمحتوى بطريقة مميزة. باختصار الكلمة المفتاحية مش بس الطفل المدلل لجوجل! صارت كمان للمحتوى في السوشيال ميديا وبتحتاجها بشدة. كتير أدوات متاحة تساعدك تستهدف الكلمات المفتاحية والهاشتاغات وتحللها متل HootSuit Insight، وSprout Social، وأداة Semrush Social Media Toolkit الأدوات المعروفة بأنها قوية في تحديد الكلمات الرائجة في محركات البحث والسوشيال ميديا.

7. الهاشتاغ #Hashtag الشائع استراتيجية تحسين الظهور على السوشيال ميديا باستخدام القصص Stories  الذكية

هاشتاغات القصص من تقنيات السوشيال ميديا الي لازم تدرجها بخطتك لتحصل على محتوى تفاعلي ناري، وما في شك إنك لازم تراعي الهاشتاغ حسب المنصة اللي شغال عليها، مثلًا سناب شات بتقدر تستخدم فيه هاشتاغات عفوية ودمها خفيف، لكن لينكد إن بدك تكون رسمي 100%.

8. لا تتجاهل الهايلايت Highlight 

قدامك فرصة من ذهب لتخلي جمهورك يعيد ويزيد بمشاهدة ستورياتك لما تحطها في الـ Highlight، هيك بتضمن تكون موجودة دائمًا بدون ما تختفي قدام عيونهم.

بمجرد دخول العميل على حسابك رح يشوف ستوريات كتير قديمة، متلًا Sephora عاملين هايلايت للمنتجات والعروض وآخر الأخبار ليضل المستهلك على اطلاع وتواصل، متل ما بتشوف بالصورة.

9. تحسين الظهور على السوشيال ميديا باستخدام القصص بالشراكة مع المؤثرين

صارت فكرة شراكة المؤثرين على السوشيال ميديا من أقوى استراتيجيات التسويق الإلكتروني عامةً. عشان هيك الظهور الأسرع بكون بتعاونك مع مؤثر. فكرة عرض حسابك أو منتجك على ستوريات المؤثرين بتفتح لك بوابة الحظ طبعًا! لكن لازم تعرف مع مين بدك تتعاون.

لو حابب الشغل الصح! تواصل معنا في الخطوة لنكون الوسيط بينك وبين المؤثر المناسب لشغلك، لأننا بنهتم نختار المؤثر الي بينكم تناسب ثقافات وكيميا طبعًا.

كيف تستغل تحسين الظهور على السوشيال ميديا باستخدام القصص Stories حسب المنصة؟

1. انستغرام Instagram 

• استخدم مزايا القصص Story من استطلاعات، روابط، ملصقات وفلاتر، ولا تنسى تحفظ القصص في Highlight.
• عرض الأفكار بأنواعها سواء لقطات كواليس، قصص تفاعلية، عرض منتجات أو غيرها.

2. فيسبوك Facebook 

• مشاركة القصص من الانستغرام والعكس كمان، فرصة لتزيد فرصة المشاهدة.
• نوع ستورياتك بين محتوى خيري، استطلاعات، وممكن ترويج لفعاليات محلية مهمة.

3. لينكد إن LinkedIn

• لينكد منصة جدية زيادة عن اللزوم بتركز على الخبرات والمهن وكل ما بتعلق فيها، باختصار ما في مكان للنهفات والمزح.
• الأفكار المتاحة إنك تطرح نصائح، خطوات، دورات، وظائف وغيرها.

4. يوتيوب Youtube

• قصص يوتيوب Youtube Stories بتختلف بأنها بتضل 7 أيام قدام جمهورك.
• الأفكار كتيرة سواء إعلانات، خلف الكواليس، استطلاعات رأي، فيديوهات فكاهية.

5. سناب شات SnapChat

سناب شات وجهة كل الباحثين عن الكوميديا والتراجيديا والمزج والضحك وأي شي بخص الحياة اليومية، هناك بتقدر تعدد أفكارك وتستخدم الفلاتر والعدسات بكل حرية.

تعاون مع المؤثرين لتوصل أكتر وتحقق تفاعل وانتشار أكبر.

الخلاصة

كل علامة تجارية اعتمدت استراتيجية تحسين الظهور على السوشيال ميديا باستخدام القصص Stories المناسبة قدرت تستحوذ على مساحة حيوية عظيمة. وحققت تفاعل أعلى بكل ذكاء؛ بالتالي ثقة عمياء من الجمهور ووعي لا متناهي بالعلامة التجارية.

لازم تعرف إنه النجاح في تعزيز التفاعل على الستوري ما بيجي بين ليلة وضحاها. بل بحتاج منك تجربة، مصداقية، مرونة ومثابرة لتحصل على فرصتك الذهبية بتقوية حضورك الرقمي.

كتير ناس أجمعت إنه الشراكة مع المؤثرين الخيار الأفضل، لو حابب تتأكد بنفسك تواصل معنا في الخطوة وإحنا بنعطيك الصافي والمفيد.

أسئلة شائعة

ليش القصص مهمة لتحسين الظهور على السوشيال ميديا؟
تعتبر القصص مهمة لتحسين الظهور على السوشيال ميديا فرصة عظيمة لوصول محتواك أول بأول لمتابعينك، وبتضاعف مستوى التفاعل والتواصل بحكم سهولة مشاهدتها.

كيف بقدر أزيد عدد المشاهدات على القصص بسرعة؟
بتقدر تزيد عدد المشاهدات على القصص من خلال النشر المنتظم، والقصص الواقعية، وشارك جمهورك لقطات ما وراء الكواليس، واستطلاعات الرأي.

هل لازم تكون الستوري احترافية حتى تنجح؟
مش لازم تكون الستوري احترافية 100%، لأنه حتى تكسب قلوب وانتباه الناس لازم تكون عفوي وطبيعي، لأنه البساطة بتزيد المصداقية وتحديدًا بالسوق العربي.