التسويق عبر المشاهير
بتلاحظ كيف إعلان واحد من مشهور بيقدر يغير رأيك بمنتج كنت أصلاً ما مفكر تشتريه؟ كل الفكرة إنك بتوثق بهالشخص وبتحس إنه جرب المنتج عن قناعة مش بس لأنه إعلان. هون بييجي دور التسويق عبر المشاهير واللي صار من أقوى الأدوات اللي بتعتمد عليها الشركات اليوم خصوصاً بالعالم الرقمي وعلى السوشال ميديا تحديداً.
إيش يعني التسويق عبر المشاهير وليش الشركات بتتجه لهذا النوع من التسويق؟
التسويق عبر المشاهير ببساطة هو إنك توصل رسالتك التسويقية من خلال شخص معروف ومؤثر على السوشال ميديا أو بأي مجال تاني. يعني بدل ما تطلع شركتك تحكي عن حالها بيجي أحد الناس بتتابعه وبتوثق فيه وبيحكي عن المنتج أو الخدمة بطريقة طبيعية وشخصية. الناس اليوم ما عادوا يتفاعلوا مع الإعلانات التقليدية مثل أول، صاروا يميلوا أكتر للمحتوى الواقعي واللي فيه لمسة إنسانية.
لهيك الشركات عم تتجه لهذا النوع من التسويق لأنه بيعطي نتائج قوية وملموسة خصوصاً إذا اختاروا المؤثر الصح. الإعلان من خلال مشهور بيقدر يوصل لفئة كبيرة من الناس بوقت قصير وبتفاعل عالي وبيخلق نوع من الثقة بين البراند والجمهور. فوق هيك هالنوع من التسويق بيساعد الشركات تبني صورة إيجابية وعصرية وبتقربها أكتر من الناس بطريقة بسيطة وغير رسمية.
كيف تختار المؤثر الصح؟
مش أي مؤثر عنده عدد متابعين كبير بنفع لحملتك! المهم تختار شخص يوصلك للجمهور اللي فعلًا مهتم بمنتجك أو خدمتك. أول إشي اسأل حالك: مين الفئة اللي بستهدفها؟ إذا كنت تروّج لمنتج تجميل فمؤثرة بمجال الجمال أو الفاشن أكيد بتكون خيار منطقي. بس لو كنت بتسوق لتطبيق تقني لازم تروح لحدا مختص أو عنده محتوى تقني.
كمان ركز على نسبة التفاعل مش بس عدد المتابعين. لأنه مرات بيكون عنده مليون متابع بس التفاعل ضعيف ومرات تانيه بتلاقي مؤثر صغير بس جمهوره مخلص وبثق فيه. ولا تنسى تشوف أسلوب المحتوى هل بنفع يقدم منتجك بطريقة بتناسب صورة البراند؟ ولا أسلوبه بعيد تماماً؟ كل هالتفاصيل بتفرق.
ومن هون دورنا بالخطوة لأننا بنسهل عليك هالمهمة. إحنا بنعمل الفلترة عنك وبنوصلك بالمؤثر الأنسب لحملتك حسب جمهورك وهدفك وميزانيتك.
إيش هي أنواع التسويق عبر المشاهير؟
التسويق عبر المشاهير صار من أقوى الأدوات اللي بتستخدمها الشركات لزيادة الوعي بالمنتجات والخدمات. فيه أكتر من نوع من التسويق وكل نوع بيخدم هدف معين حسب نوع الحملة والجمهور المستهدف. خلينا نحكي عن هالأنواع بالتفصيل:
منشورات ورعايات مدفوعة
هاذ النوع من التسويق بيشمل إنك تدفع للمؤثر عشان ينشر عن منتجك أو خدمتك على حساباته. هالمحتوى بيكون مدفوع يعني المؤثر رح يذكر البراند أو المنتج بطريقة تجذب انتباه متابعيه. عادة بيكون على شكل بوستات أو ستوريات. الشركات بتختار هالطريقة إذا كانوا بدهم وصول سريع للجمهور وزيادة الوعي.
تجارب شخصية
هون المؤثر أو المشهور بيسوي فيديو أو بوست عن تجربته الشخصية مع المنتج زي ما بيحكي عن رأيه إذا أعجبو أو لا. هاذ النوع من التسويق بيخلي المتابعين يشوفوا المنتج من زاوية حقيقية وواقعية وهالشي بيساعد في بناء الثقة مع الجمهور. متابعين المؤثر غالباً بيتأثروا بشكل أكبر لما يشوفوا التجربة الحقيقية.
التسويق عبر المشاهير بالهدايا
بهاي الطريقة الشركات بتبعت منتجات مجانية للمؤثرين أو المشهورين عشان يجربوها ويشاركوها مع متابعيهم إذا عجبتهم. الهدايا مش دايماً بتكون مرتبطة باتفاق مدفوع لكن إذا المنتج عجب المؤثر هو ممكن يتكلم عنه ويعطيه توصية. هاي طريقة بميزها عن باقي طرق التسويق عبر المشاهير بأنها غير مكلفة وفيها نوع من العفوية اللي بتجذب الانتباه.
الظهور في حملات رسمية
العلامة التجارية بتتعاون مع المؤثر ليكون وجه الحملة لفترة طويلة. المؤثر بهالحالة بيكون سفير للبراند وبيشارك في حملات متعددة على السوشال ميديا أو حتى على وسائل الإعلام. هالنوع بيخلق علاقة قوية بين البراند والمشهور وبيساعد في تعزيز صورة الشركة بشكل أكبر.
المسابقات والتحديات
اللي بصير أنو الشركات بتتفق مع المؤثرين بتنظيم مسابقات أو تحديات يتفاعل فيها المتابعين عشان يربحوا جوائز من البراند. هاي طريقة ممتعة من طرق التسويق عبر المشاهير ومؤثرة لزيادة التفاعل والانتشار خصوصاً لما المتابعين يشاركون تحدي أو يذكرون هالمنتج في منصاتهم. التحديات بتخلق جو من الحماس والاندفاع للمشاركة.
التسويق بالعمولة
التسويق بالعمولة يعني إن المؤثر بيحصل على عمولة عن كل عملية شراء بتتم من خلال رابط خاص فيه. هاد النوع من التسويق بيشجع المؤثرين على بذل جهد أكبر لترويج المنتج لأنو كلما زادت المبيعات زادت أرباحهم. الطريقة هاي فعالة لأن المؤثرين بيحسوا بالحوافز المباشرة لتحفيز جمهورهم على الشراء.
إيش الفرق بين التسويق عبر المشاهير والتسويق التقليدي؟
التسويق عبر المشاهير هو إنك تستخدم تأثير نجم أو مؤثر سواء كان معروف على التلفزيون أو مشهور على السوشال ميديا عشان يروّج لمنتجك أو خدمتك. الهدف مش بس توصل لإعلان بل تبني ثقة حقيقية مع الجمهور لأن الناس بطبيعتها بتوثق بالشخص اللي بتحبه وبتتابعه. على سبيل مثال:
- فاشينيستا بتحكي عن براند ملابس.
- لاعب كرة بظهر بحملة مشروب طاقة.
- يوتيوبر بيجرب منتج وبيحكي رأيه.
أما التسويق التقليدي فهو الطرق الكلاسيكية المعروفة للإعلان زي إعلانات التلفزيون أو الراديو أو الجرايد وحتى البروشورات أو اللوحات بالشوارع. مثل:
- إعلان شامبو بنص مسلسل.
- لوحة على الدوار بتحكي عن مطعم جديد.
- منشور ممول على فيسبوك من صفحة الشركة.
خلاصة الكلام
التسويق عبر المشاهير صار من الأدوات الأساسية لنجاح الحملات التسويقية وبالتحديد على السوشال ميديا. الشركات اليوم عم تستخدمه لأنها بتقدر توصل للناس بشكل مؤثر وطبيعي من خلال المؤثرين اللي بيملكوا ثقة كبيرة من جمهورهم. مهما كانت نوعية الحملة أو المنتج بيظل اختيار المؤثر الصح هو المفتاح لنجاح الحملة وزيادة التفاعل مع الجمهور. وبالخطوة إحنا جاهزين نساعدك بتحديد الأنسب لحملتك وتنفيذ استراتيجية تسويقية ناجحة.
اقرأ أيضا:
حلول تسويقية لتضمن نجاح حملاتك
اسئلة شائعة
إيش هو التسويق عبر المشاهير؟
التسويق عبر المشاهير هو استخدام شخص معروف ومؤثر على السوشال ميديا للترويج لمنتج أو خدمة بطريقة طبيعية وشخصية بدلاً من الإعلانات التقليدية.
ليش الشركات بتستخدم التسويق عبر المشاهير؟
الشركات بتستخدمه لأنه بيعطي نتائج سريعة وفعّالة ويوصل الرسالة بطريقة أقرب للناس ويزيد الثقة بين الجمهور والبراند.
كيف ممكن تختار المؤثر الصح لحملتك؟
اختار مؤثر يتناسب مع جمهورك المستهدف واهتم بنسبة التفاعل مش بس عدد المتابعين. تأكد كمان من أسلوب المحتوى إذا كان يناسب صورة منتجك.
إيش هي الأنواع المختلفة للتسويق عبر المشاهير؟
الأنواع تشمل المنشورات المدفوعة وتجارب شخصية والهدايا والظهور في حملات رسمية والمسابقات والتحديات والتسويق بالعمولة.
هل التسويق عبر المشاهير يناسب كل أنواع المنتجات؟
نعم التسويق عبر المشاهير بيكون فعال لمختلف المنتجات والخدمات بشرط اختيار المؤثر المناسب وتحديد الهدف من الحملة بدقة.